കടലാക്രമണം രൂക്ഷം, പാലക്കാട്ട് തെങ്ങ് വീണ് വീട്ടമ്മ മരിച്ചു; വ​ട​ക​ര​യി​ല്‍ വീ​ട് ത​ക​ര്‍​ന്നു

കൊച്ചി : കനത്ത മഴയിലും കാറ്റിലും സംസ്ഥാനത്ത് വ്യാപക നാശനഷ്ടമുണ്ടായി. പാലക്കാട് വടക്കഞ്ചേരിയിൽ പാടത്ത് ജോലിക്കിടെ തെങ്ങുവീണ് വീട്ടമ്മ മരിച്ചു. പല്ലാറോ‍ഡ് സ്വദേശിനി തങ്കമണി (55) ആണ് മരിച്ചത്. ഒരാൾക്ക് പ​രി​ക്കേ​റ്റു.

കൊച്ചി പാലാരിവട്ടത്ത് മരം വീണ് രണ്ടു ബൈക്ക് യാത്രികർക്ക് പരുക്കേറ്റു. ഇവരെ ആശുപത്രിയിൽ പ്രവേശിപ്പിച്ചു. ഗതാഗതം മുടങ്ങിയതിനു പിന്നാലെ അഗ്നിരക്ഷാ സേന മരം മുറിച്ചുമാറ്റി. പനങ്ങാട് ദേശീയപാതയിലേക്ക് മരം വീണു കാറിനു കേടുപാട് പറ്റി. ആർക്കും പ​രി​ക്കില്ല. എറണാകുളം കെഎസ്ആർടിസി ബസ് സ്റ്റാൻഡ‍ിൽ വെള്ളം കയറി. കൊല്ലത്തും വ്യാപക നാശനഷ്ടമുണ്ടായി. ചെങ്കോട്ട റെയിൽപാതയിൽ മരം വീണ് ഗതാഗതം തടസ്സപ്പെട്ടു. പുനലൂർ – കൊല്ലം, കൊല്ലം – പുനലൂർ മെമു സർവീസുകൾ റദ്ദാക്കി. കുണ്ടറയിലും പുനലൂരും മരം വീണ് വീടുകൾ തകർന്നു.

എറണാകുളം ഞാറക്കൽ വെളിയത്താംപറമ്പിൽ കടലാക്രമണം രൂക്ഷമായി. ഇരുന്നൂറിലധികം വീടുകളിൽ വെള്ളം കയറി. ചെല്ലാനം, പുത്തൻതോട്, ചെറിയകടവ്, കണ്ണമാലി മേഖലകളിലും കടൽക്ഷേഭമുണ്ട്. മലപ്പുറം പൊന്നാനിയിൽ കടൽക്ഷോഭത്തെ തുടർന്നു 20 വീടുകളിൽ വെള്ളം കയറി. ആലപ്പുഴ ഹരിപ്പാടും കരുവാറ്റയിലും ദേശീയപാത നിര്‍മാണം നടക്കുന്ന ഇടങ്ങളില്‍ വീടുകളില്‍ വെള്ളം കയറി. ചേര്‍ത്തല നഗരത്തിന്റെ പലയിടങ്ങളിലും വെള്ളക്കെട്ട് രൂക്ഷമാണ്. കാളികുളത്ത് തെങ്ങ് വീണ് കട തകര്‍ന്നു. കണിച്ചുകുളങ്ങരയില്‍ വൈദ്യുതി ലൈനുകള്‍ക്ക് നാശമുണ്ടായി. തിരുവനന്തപുരം മുതലപ്പൊഴിയിൽ ശക്തമായ തിരയിൽ വള്ളം മറിഞ്ഞു. മൂന്നു തൊഴിലാളികൾ നീന്തി രക്ഷപ്പെട്ടു. വള്ളം ഒഴുകിപ്പോയി. കോട്ടയം വൈക്കം തോട്ടുവക്കത്ത് മരം ഒടിഞ്ഞുവീണ് സൈക്കിൾ യാത്രികനു പ​രി​ക്കേ​റ്റു. വെച്ചൂരിൽ വീട് ഇടിഞ്ഞു വീണു, ആർക്കും പ​രി​ക്കില്ല.

കോ​ഴി​ക്കോ​ട് വ​ട​ക​ര​യി​ല്‍ വീ​ട് ത​ക​ര്‍​ന്നു. വ​ട​ക​ര സ്വ​ദേ​ശി സ​ഫി​യ​യു​ടെ വീ​ടാ​ണ് ത​ക​ര്‍​ന്ന​ത്.രാ​വി​ലെ പ​ത്തി​നാ​ണ് സം​ഭ​വം. മേ​ല്‍​ക്കൂ​ര​യു​ടെ ഭാ​ഗം വീ​ടി​നു​ള്ളി​ലേ​ക്ക് ത​ക​ര്‍​ന്നു വീ​ഴു​ക​യാ​യി​രു​ന്നു. വീ​ടി​ന്‍റെ ചു​മ​രു​ക​ള്‍​ക്ക് വി​ള്ള​ലു​ണ്ട്. ഈ ​സ​മ​യം സ​ഫി​യ​യു​ടെ മ​ക​ന്‍ സ​മീ​ര്‍ വീ​ട്ടി​ലു​ണ്ടാ​യി​രു​ന്നു. വ​ലി​യ ശ​ബ്ദം കേ​ട്ട് ഇ​റ​ങ്ങി​യോ​ടി​യ​തു​കൊ​ണ്ടാ​ണ് ഇ​യാ​ള്‍ ര​ക്ഷ​പ്പെ​ട്ട​ത്.

പത്തനംതിട്ട മണിയാർ അണക്കെട്ടിന്റെ രണ്ടു ഷട്ടറുകൾ 70 സെ.മീ വീതം ഉയർത്തി. അരയാഞ്ഞിലിമൺ, കുറുമ്പൻമൂഴി കോസ്‌വേകൾ മുങ്ങി. കോട്ടാങ്ങലിൽ കിണർ ഇടിഞ്ഞുതാഴ്ന്നു. നിരണത്ത് ശക്തമായ കാറ്റിൽ തെങ്ങ് വീണ് നിരണം സ്വദേശിയ ഷാജിയുടെ പശു ചത്തു. മണിമലയാറ്റിൽ ജലനിരപ്പ് ഉയരുന്നു. കല്ലൂപ്പാറ, പുല്ലകയാർ ഭാഗങ്ങളിൽ ജലനിരപ്പ് അപകടനിലയ്ക്ക് മുകളിലാണ്. തിരുവല്ല പെരിങ്ങരയിൽ ആൽമരത്തിന്റെ ചില്ല ഒടിഞ്ഞ് രണ്ടു കാറുകൾക്ക് കേടുപാടു പറ്റി. പെരിങ്ങര ഗവ.ഹയർ സെക്കൻഡറി സ്കൂളിനു സമീപമാണ് അപകടം. ഏനാദിമംഗലത്ത് തേക്ക് കടപുഴകി ഒരു മണിക്കൂറോളം ഗതാഗതം തടസ്സപ്പെട്ടു. കോഴിക്കോട് ചക്കിട്ടപ്പാറ പഞ്ചായത്ത് ഓഫിസിനു സമീപം മരം കടപുഴകി വീണു.

ഇടുക്കി, കണ്ണൂർ, കാസർകോട് ജില്ലകളിൽ ദേശീയ കാലാവസ്ഥ നിരീക്ഷണ കേന്ദ്രം ഇന്നു റെഡ് അലർട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടാണ്. 4 ദിവസം ശക്തമായ മഴ തുടരുമെന്നു കാലാവസ്ഥാ വകുപ്പ് അറിയിച്ചു. അതീവ ജാഗ്രതപാലിക്കാന്‍ കാലാവസ്ഥാ വകുപ്പ് നിര്‍ദേശം നൽകി.