ബംഗാളിൽ ലീഡിൽ കേവലഭൂരിപക്ഷം കടന്ന് ബിജെപി

കൊൽക്കത്ത : പശ്ചിമ ബംഗാളിൽ വോട്ടെണ്ണൽ പുരോഗമിക്കുമ്പോൾ രാഷ്ട്രീയ ചിത്രത്തിൽ വലിയ മാറ്റങ്ങൾ ദൃശ്യമാകുന്നു. ഏറ്റവും പുതിയ സൂചനകൾ പ്രകാരം ബിജെപി നയിക്കുന്ന എൻഡിഎ സഖ്യം കേവലഭൂരിപക്ഷത്തിന് ആവശ്യമായ 148 സീറ്റുകൾ പിന്നിട്ടു. നിലവിൽ 162 സീറ്റുകളിലാണ് ബിജെപി മുന്നിട്ടുനിൽക്കുന്നത്. പല എക്സിറ്റ് പോൾ പ്രവചനങ്ങളെയും അപ്രസക്തമാക്കിക്കൊണ്ട് ഭരണകക്ഷിയായ തൃണമൂൽ കോൺഗ്രസ് 115 സീറ്റുകളിലേക്ക് പിന്തള്ളപ്പെട്ടു. സംസ്ഥാനത്ത് ആദ്യമായി ഭരണമുറപ്പിക്കാമെന്ന പ്രതീക്ഷയിലാണ് ബിജെപി ക്യാമ്പ്.

അതേസമയം, ഭവാനിപൂർ മണ്ഡലത്തിൽ മുഖ്യമന്ത്രി മമത ബാനർജി ശക്തമായ തിരിച്ചുവരവ് നടത്തി. ആദ്യഘട്ടത്തിൽ പിന്നിലായിരുന്ന മമത, ഒടുവിൽ ലഭിക്കുന്ന കണക്കുകൾ പ്രകാരം ബിജെപിയിലെ സുവേന്ദു അധികാരിയേക്കാൾ 1,996 വോട്ടുകൾക്ക് മുന്നിലാണ്. സംസ്ഥാനത്ത് ബിജെപി മുന്നേറ്റം തുടരുമ്പോഴും തന്റെ സിറ്റിംഗ് സീറ്റിൽ ലീഡ് നിലനിർത്താൻ മമതയ്ക്ക് സാധിക്കുന്നത് തൃണമൂൽ പ്രവർത്തകർക്ക് ആശ്വാസം നൽകുന്നുണ്ട്.

ശ്രദ്ധേയമായ മുന്നേറ്റങ്ങൾ :

ആസൻസോൾ ദക്ഷിണിൽ ബിജെപിയുടെ അഗ്നിമിത്ര പോളും സൂരിയിൽ ബിജെപി സ്ഥാനാർത്ഥി ജഗന്നാഥ് ചതോപാധ്യായയും മുന്നിട്ടുനിൽക്കുന്നു. അതേസമയം ഹൂഗ്ലിയിലെ ജംഗിപാറ മണ്ഡലത്തിൽ മമത സർക്കാരിലെ മന്ത്രി സ്നേഹാശിഷ് ചക്രവർത്തിയാണ് മുന്നിലുള്ളത്.

രാവിലെ 8 മണിക്ക് തപാൽ വോട്ടുകളോടെ ആരംഭിച്ച വോട്ടെണ്ണലിൽ 8.30-ഓടെ ഇവിഎം വോട്ടുകളും എണ്ണിത്തുടങ്ങി. 293 മണ്ഡലങ്ങളിലും പോരാട്ടം കടുക്കുന്ന സാഹചര്യത്തിൽ ഉച്ചയോടെ മാത്രമേ കൃത്യമായ ഭൂരിപക്ഷം ആർക്കെന്ന് വ്യക്തമാവുകയുള്ളൂ. ബംഗാളിൽ നാലാം തവണയും ഭരണം പിടിക്കാൻ മമത ബാനർജി ശ്രമിക്കുമ്പോൾ, കിഴക്കൻ ഇന്ത്യയിലെ ഏറ്റവും വലിയ മുന്നേറ്റത്തിനാണ് ബിജെപി ലക്ഷ്യമിടുന്നത്.

സംസ്ഥാനത്ത് സംഘർഷ സാധ്യത ഒഴിവാക്കാൻ കേന്ദ്ര തിരഞ്ഞെടുപ്പ് കമ്മീഷൻ കർശന നടപടികൾ സ്വീകരിച്ചിട്ടുണ്ട്. വിജയറാലികൾക്ക് സംസ്ഥാനത്തുടനീളം വിലക്ക് ഏർപ്പെടുത്തിയതായി സ്പെഷ്യൽ ഒബ്‌സർവർ സുബ്രത ഗുപ്ത അറിയിച്ചു.

മുഖ്യമന്ത്രി മമത ബാനർജിയെ സംബന്ധിച്ചിടത്തോളം ഇത് അതീവ നിർണ്ണായകമായ പോരാട്ടമാണ്. നാലാം തവണയും അധികാരം നിലനിർത്താൻ തൃണമൂൽ ശ്രമിക്കുമ്പോൾ, കിഴക്കൻ ഇന്ത്യയിൽ തങ്ങളുടെ സ്വാധീനം ഉറപ്പിക്കാനാണ് ബിജെപി ലക്ഷ്യമിടുന്നത്. അതേസമയം, കഴിഞ്ഞ തവണ നേരിട്ട തിരിച്ചടികളിൽ നിന്ന് കരകയറാനാണ് ഇടതുമുന്നണിയുടെയും കോൺഗ്രസിൻറെയും ശ്രമം. എക്സിറ്റ് പോൾ ഫലങ്ങളും ബി.ജെ.പിക്ക് മുൻതൂക്കം നൽകുന്നതായിരുന്നു.