വിജയ് ആരാധകരെ ആവേശത്തിലാക്കി ‘ജന നായകൻ’ റിലീസിലേക്ക്

ചെന്നൈ : തമിഴ് സൂപ്പർതാരം വിജയ് നായകനാകുന്ന, അദ്ദേഹത്തിന്റെ അഭിനയജീവിതത്തിലെ അവസാന ചിത്രമെന്ന് വിലയിരുത്തപ്പെടുന്ന ‘ജന നായകൻ’ വീണ്ടും വാർത്തകളിൽ ഇടംപിടിക്കുകയാണ്. ചിത്രത്തിന്റെ റിലീസുമായി ബന്ധപ്പെട്ട പുതിയ റിപ്പോർട്ടുകൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. എന്നാൽ ഇതുവരെ നിർമ്മാതാക്കൾ ഔദ്യോഗിക പ്രഖ്യാപനം നടത്തിയിട്ടില്ല.

കാനഡയിൽ ചിത്രം വിതരണത്തിനെത്തിക്കുന്ന York Cinemas എക്‌സിൽ പങ്കുവെച്ച പോസ്റ്റിൽ ചിത്രം ജൂലൈ 24 മുതൽ പ്രദർശനത്തിനെത്തുമെന്ന് വ്യക്തമാക്കിയിട്ടുണ്ട്. പിന്നാലെ സിനിമാ ട്രാക്കിങ് പ്ലാറ്റ്ഫോമായ Lets Cinemaയും ഇതേ റിലീസ് തീയതി സ്ഥിരീകരിക്കുന്ന തരത്തിൽ പോസ്റ്റ് പങ്കുവെച്ചു. ഇതോടെയാണ് ചിത്രം ആഗോളതലത്തിൽ അതേ ദിവസം റിലീസ് ചെയ്യുമെന്ന റിപ്പോർട്ടുകൾക്ക് കൂടുതൽ ശക്തി ലഭിച്ചത്. എന്നിരുന്നാലും, റിലീസ് തീയതി സംബന്ധിച്ച് നിർമ്മാതാക്കളുടെ ഔദ്യോഗിക സ്ഥിരീകരണം ഇതുവരെ വന്നിട്ടില്ല.

എച്ച്. വിനോദ് സംവിധാനം ചെയ്യുന്ന ‘ജന നായകൻ’ ഒരു ആക്ഷൻ-ഡ്രാമ ചിത്രമാണ്. മുൻ പൊലീസ് ഉദ്യോഗസ്ഥനായ വെട്രി കൊണ്ടൻ എന്ന കഥാപാത്രമായാണ് വിജയ് എത്തുന്നതെന്നാണ് റിപ്പോർട്ടുകൾ. രാജ്യത്തെ വലിയ പ്രതിസന്ധിയിലേക്ക് നയിക്കുന്ന ഗൂഢാലോചനയും അതിനെതിരെ നായകൻ നടത്തുന്ന പോരാട്ടവുമാണ് ചിത്രത്തിന്റെ പ്രമേയമെന്നാണ് സൂചന.

ചിത്രത്തിൽ ബോബി ഡിയോൾ, പൂജ ഹെഗ്ഡെ, മമിത ബൈജു, ഗൗതം വാസുദേവ് മേനോൻ, പ്രകാശ് രാജ്, പ്രിയാമണി, നരേൻ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. അനിരുദ്ധ് രവിചന്ദറാണ് സംഗീത സംവിധാനം നിർവഹിക്കുന്നത്.

വിജയ് സജീവ രാഷ്ട്രീയത്തിലേക്ക് കടക്കാനൊരുങ്ങുന്ന സാഹചര്യത്തിൽ, അദ്ദേഹത്തിന്റെ അവസാന ചിത്രമെന്ന പ്രത്യേകത ‘ജന നായകൻ’ക്ക് വലിയ പ്രതീക്ഷയാണ് നൽകുന്നത്. റിലീസിനിടെ ടിക്കറ്റ് നിരക്കുമായി ബന്ധപ്പെട്ട വിവാദങ്ങളോ കള്ളടിക്കറ്റ് വിൽപ്പനയോ ഉണ്ടാകാതിരിക്കാൻ പ്രത്യേക ജാഗ്രത വേണമെന്ന് വിജയ് നിർദേശിച്ചിട്ടുണ്ടെന്ന റിപ്പോർട്ടുകളും അടുത്തിടെ പുറത്തുവന്നിരുന്നു.