തുടര്‍ച്ചയായി രണ്ടാം വര്‍ഷവും ഇന്ത്യ കിരീടം അടിയറ വച്ചു, ഓസ്‌ട്രേലിയ ഐസിസി ലോക ടെസ്റ്റ് ചാമ്പ്യന്‍മാര്‍
ഫേസ്ബുക്ക്, ഇന്‍സ്റ്റഗ്രാം, ട്വിറ്റര്‍ തുടങ്ങിയവയിലുള്ള സര്‍ക്കാര്‍വിരുദ്ധ എഴുത്തുകള്‍ ചട്ടലംഘനമാകും , ഫയൽ മുഖ്യമന്ത്രിയുടെ മുന്നിൽ
June 11, 2023
കൈസര്‍ഗഞ്ചില്‍ ബ്രിജ്ഭൂഷന്റെ ശക്തിപ്രകടനം, 2024 ലും മത്സരിക്കുമെന്ന് പ്രഖ്യാപനം
June 11, 2023
ലണ്ടന്‍: ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ ഇന്ത്യ വീണു. തുടര്‍ച്ചയായി രണ്ടാം വര്‍ഷവും ഇന്ത്യ കിരീടം അടിയറ വച്ചു. ഓസ്‌ട്രേലിയ ഐസിസി ലോക ടെസ്റ്റ് ചാമ്പ്യന്‍മാര്‍. ഓസ്‌ട്രേലിയ മുന്നില്‍ വച്ച 444 റണ്‍സ് വിജയ ലക്ഷ്യം പിന്തുടര്‍ന്ന ഇന്ത്യയുടെ പോരാട്ടം രണ്ടാം ഇന്നിങ്‌സില്‍ 234 റണ്‍സില്‍ അവസാനിപ്പിച്ചാണ് ഓസ്‌ട്രേലിയ കിരീടം സ്വന്തമാക്കിയത്. 209 റണ്‍സിന്റെ മിന്നും ജയമാണ് അവര്‍ സ്വന്തമാക്കിയത്.ആദ്യ ഇന്നിംഗ്സിൽ 163 റൺസ് നേടി വമ്പൻ ടീം സ്കോർ പടുത്തുയർത്തിയ ട്രാവിസ് ഹെഡ് ആണ് കളിയിലെ താരം.
ഇതോടെ മൂന്ന് ഫോര്‍മാറ്റിലും ലോക കിരീടം നേടുന്ന ആദ്യ ടീമായി ഓസ്‌ട്രേലിയ മാറി. നേരത്തെ ഏകദിന, ടി20 ലോക കിരീടങ്ങള്‍ അവര്‍ക്ക് സ്വന്തമായിരുന്നു. ഒന്നാം ഇന്നിങ്‌സില്‍ ഓസ്‌ട്രേലിയ 469ന് പുറത്തായപ്പോള്‍ ഇന്ത്യയുടെ പോരാട്ടം 296 റണ്‍സില്‍ അവസാനിച്ചു. ഓസ്‌ട്രേലിയ രണ്ടാം ഇന്നിങ്‌സില്‍ എട്ട് വിക്കറ്റ് നഷ്ടത്തില്‍ 270 റണ്‍സെടുത്തു ഇന്നിങ്‌സ് ഡിക്ലയര്‍ ചെയ്തു. അഞ്ചാം ദിനത്തില്‍ വിരാട് കോഹ്‌ലി- അജിന്‍ക്യ രഹാനെ സഖ്യം ഇന്ത്യയെ വിജയത്തിലേക്കെത്തിക്കുമെന്ന് പ്രതീക്ഷിക്കപ്പെട്ടെങ്കിലും അതുണ്ടായില്ല. സ്‌കോട്ട് ബോളണ്ടിന്റെ ഇട്ട പ്രഹരത്തില്‍ ഇന്ത്യ തുടക്കത്തില്‍ തന്നെ പ്രതിരോധത്തിലായി.
അഞ്ചാം ദിനത്തില്‍ ബാറ്റിങ് പുനരാരംഭിച്ച ഇന്ത്യക്ക് തുടക്കത്തില്‍ തന്നെ വിരാട് കോഹ്‌ലിയേയും തൊട്ടു പിന്നാലെ രവീന്ദ്ര ജഡേജയേയും നഷ്ടമായി. കോഹ്‌ലി 49 റണ്‍സുമായി മടങ്ങി. സ്‌കോട്ട് ബോളണ്ടിന്റെ പന്തില്‍ മുന്‍ ഓസീസ് ക്യാപ്റ്റന്‍ സ്റ്റീവ് സ്മിത്ത് അദ്ദേഹത്തെ ഉജ്ജ്വല ക്യാച്ചില്‍ പുറത്താക്കി. തൊട്ടു പിന്നാലെ എത്തിയ രവീന്ദ്ര ജഡേജയും റണ്ണൊന്നുമെടുക്കാതെ വീണു. താരം വിക്കറ്റ് കീപ്പര്‍ അലക്‌സ് കാരിക്ക് ക്യാച്ച് നല്‍കി മടങ്ങി.
പിന്നീട് ശ്രീകര്‍ ഭാരതിനെ കൂട്ടുപിടിച്ച് രഹാനെ പോരാട്ടം നയിച്ചു. ഈ സഖ്യം നിലയുറപ്പിക്കുമെന്ന പ്രതീക്ഷ ജനിപ്പിച്ചു. എന്നാല്‍ മിച്ചല്‍ സ്റ്റാര്‍ക്ക് ആ പ്രതീക്ഷകളെ തല്ലിക്കെടുത്തി. രഹാനെയെ സ്റ്റാര്‍ക്ക് വിക്കറ്റ് കീപ്പര്‍ അലക്‌സ് കാരിയുടെ കൈകളില്‍ എത്തിച്ചു. ഒന്നാം ഇന്നിങ്‌സില്‍ ഇന്ത്യയുടെ രക്ഷകനായ രഹാനെയുടെ മടക്കം ടെസ്റ്റിന്റെ വിധി ഏറെക്കുറെ നിര്‍ണയിക്കപ്പെടുന്ന ഘട്ടത്തിലേക്ക് കടന്നു. തൊട്ടു പിന്നാലെ നതാന്‍ ലിയോണ്‍ ശാര്‍ദുല്‍ ഠാക്കൂറിനെ വിക്കറ്റിന് മുന്നില്‍ കുരുക്കി ഇന്ത്യയെ കടുത്ത പ്രതിരോധത്തിലേക്ക് വീഴ്ത്തി.
108 പന്തുകള്‍ ചെറുത്ത് 46 റണ്‍സാണ് രഹാനെ കണ്ടെത്തിയത്. താരം ഏഴ് ഫോറുകളും അടിച്ചു. ഉമേഷ് യാദവും ക്ഷണത്തില്‍ മടങ്ങി. താരം ഒരു റണ്‍സാണ് കണ്ടെത്തിയത്. സ്റ്റാര്‍ക്കിന്റെ പന്തില്‍ അലക്‌സ് കാരിക്ക് ക്യാച്ച് നല്‍കിയാണ് ഉമേഷ് പുറത്തായത്. അല്‍പ്പ നേരം പിടിച്ചു നിന്ന ശ്രീകര്‍ ഭരത് കൂടുതല്‍ പ്രതിരോധത്തിന് നില്‍ക്കാതെ മടങ്ങി. താരം 41 പന്തില്‍ 23 റണ്‍സെടുത്തു. നതാന്‍ ലിയോണ്‍ സ്വന്തം പന്തില്‍ ഭരതിനെ ക്യാച്ചെടുത്തു മടക്കുകയായിരുന്നു. ഒടുവില്‍ മുഹമ്മദ് സിറാജിനെ വീഴ്ത്തി ലിയോണ്‍ ഇന്ത്യയുടെ പതനം പൂര്‍ത്തിയാക്കി.
ഓസീസിനായി നതാന്‍ ലിയോണ്‍ നാല് വിക്കറ്റുകള്‍ വീഴ്ത്തി അഞ്ചാം ദിനം ഇന്ത്യയുടെ നട്ടെല്ലൊടിച്ചു. സ്‌കോട്ട് ബോളണ്ട് മൂന്നും മിച്ചല്‍ സ്റ്റാര്‍ക്ക് രണ്ട് വിക്കറ്റുകളും പാറ്റ് കമ്മിന്‍സ് ഒരു വിക്കറ്റും നേടി. രണ്ടാം ദിനത്തിലെ ഇന്ത്യൻ ഇന്നിംഗ്സ് കണ്ടപ്പോൾ മുതൽ ക്രിക്കറ്റ് വൃത്തങ്ങളിൽ നിന്ന് സ്ഥിരം ന്യായീകരണ പല്ലവികളായ ഐപിഎൽ ക്ഷീണം, ഋഷഭ് പന്തിന്‍റെയും ജസ്പ്രീത് ബുംറയുടെയും പരിക്ക്, ടോസിന് ശേഷമുള്ള മോശം തീരുമാനം എന്നിവ ഉയർന്നുവന്നിരുന്നു. എങ്കിലും ഒരു ദശാബ്ദമായി തുടരുന്ന ട്രോഫി ദാരിദ്യത്തിന് അറുതിവരുത്താൻ ഭാവിയിൽ ടീം മാനേജ്മെന്‍റ് എന്തെങ്കിലും മാറ്റം വരുത്തുമോ എന്ന് കാത്തിരുന്ന് കാണാം.
