തിരുവനന്തപുരം കോര്പ്പറേഷനിലെ കയ്യാങ്കളി; നാല് ബിജെപി കൗണ്സിലര്മാര്ക്കെതിരെ കേസ്
കാലവര്ഷം ചതിച്ചു : ഡാമുകളില് ജലനിരപ്പ് കാല്ഭാഗം മാത്രം; വൈദ്യുതി പ്രതിസന്ധി രൂക്ഷമാകും
June 30, 2026
ജൂലൈ മാസത്തെ യാത്രാ കലണ്ടര് പുറത്തിറക്കി കെഎസ്ആര്ടിസി ബജറ്റ് ടൂറിസം സെല്ല്
June 30, 2026
തിരുവനന്തപുരം : തിരുവനന്തപുരം നഗരസഭാ കോര്പറേഷന് ഓഫീസിലെ കൗണ്സില് ഹാളില് യുഡിഎഫ്-ബിജെപി കൗണ്സിലര്മാര് തമ്മിലുണ്ടായ സംഘര്ഷത്തില് നാല് ബിജെപി കൗണ്സിലര്മാര്ക്കെതിരെ മ്യൂസിയം പൊലീസ് കേസെടുത്തു. ബിജെപി കൗണ്സിലര്മാരായ ചെമ്പഴന്തി ഉദയന്, ഗിരി, രതീഷ്, പാപ്പനംകോട് സജി എന്നിവര്ക്കെതിരെയാണ് പൊലീസ് എഫ്ഐആര് രജിസ്റ്റര് ചെയ്തിരിക്കുന്നത്. യുഡിഎഫ് വനിതാ കൗണ്സിലര്മാരായ ഷേര്ലി. എസ്, അനിത അലക്സ് എന്നിവരുടെ പരാതിയിലാണ് നടപടി.
2026 ജൂണ് 29-ാം തീയതി തിങ്കളാഴ്ച വൈകുന്നേരം 3 മണിയോടെ കോര്പ്പറേഷന് കൗണ്സില് ഹാളില് വെച്ചായിരുന്നു സംഭവം. കൗണ്സില് യോഗത്തിന്റെ അറ്റന്ഡന്സ് രജിസ്റ്ററില് ഒപ്പിടാന് തുടങ്ങിയ പരാതിക്കാരിയായ ഷേര്ലിയെയും മറ്റ് വനിതാ കൗണ്സിലര്മാരെയും പ്രതികള് തടഞ്ഞുവെക്കുകയും ദേഹോപദ്രവം ഏല്പ്പിക്കുകയുമായിരുന്നു.
ഒന്നാം പ്രതിയായ ചെമ്പഴന്തി ഉദയന് പരാതിക്കാരിയായ ഷേര്ലിയെയും അനിത അലക്സിനെയും മറ്റ് കൗണ്സിലര്മാരെയും കൈകൊണ്ട് അടിച്ചു പരിക്കേല്പ്പിച്ചു. ഷേര്ലിയുടെ കഴുത്തിനു പുറകില് ഇയാള് ബലമായി അടിച്ച് വേദനിപ്പിച്ചതായും എഫ്ഐആറില് വ്യക്തമാക്കുന്നു. മര്ദ്ദനമേറ്റതിനെ തുടര്ന്ന് പരിക്കുകളോടെ യുഡിഎഫ് കൗണ്സിലര് ഷേര്ലിയെ തിരുവനന്തപുരം ജനറല് ആശുപത്രിയില് പ്രവേശിപ്പിച്ചു. ആശുപത്രിയില് ചികിത്സയില് കഴിഞ്ഞിരുന്ന ഷേര്ലിയില് നിന്നും മ്യൂസിയം പൊലീസ് ഉദ്യോഗസ്ഥര് നേരിട്ടെത്തി മൊഴി രേഖപ്പെടുത്തിയ ശേഷമാണ് കേസ് രജിസ്റ്റര് ചെയ്തത്.
