മാസപ്പടിക്കേസ് : വീണ വിജയന് വെള്ളിയാഴ്ച ഹാജരാകാൻ ഇഡി സമൻസ്

തിരുവനന്തപുരം : സംസ്ഥാന രാഷ്ട്രീയത്തിൽ ഏറെ കോളിളക്കം സൃഷ്ടിച്ച മാസപ്പടിക്കേസിൽ മുൻ മുഖ്യമന്ത്രി പിണറായി വിജയന്റെ മകൾ ടി. വീണയ്ക്ക് എൻഫോഴ്സ്മെന്റ് ഡയറക്ടറേറ്റിന്റെ സമൻസ്. ഈ വരുന്ന വെള്ളിയാഴ്ച കൊച്ചിയിലെ ഇഡി ഓഫീസിൽ ചോദ്യം ചെയ്യലിനായി ഹാജരാകാനാണ് നിർദേശം നൽകിയിരിക്കുന്നത്. കേസുമായി ബന്ധപ്പെട്ട് അന്വേഷണം തുടരാമെന്ന ഹൈക്കോടതിയുടെ അനുകൂല വിധി വന്നതിന് പിന്നാലെയാണ് ഇഡിയുടെ ഈ നിർണായക നീക്കം.

ടി. വീണയ്ക്ക് പുറമെ എട്ടുപേർക്കു കൂടി ഇഡി സമൻസ് അയച്ചിട്ടുണ്ട്. സിഎംആർഎൽ മാനേജിങ് ഡയറക്ടർ ശശിധരൻ കർത്ത, ജോയിന്റ് മാനേജിങ് ഡയറക്ടർ ശരൺ എസ്. കർത്ത, ചീഫ് ജനറൽ മാനേജർ കെ.എസ്. സുശേഷ് കുമാർ എന്നിവരാണ് സമൻസ് ലഭിച്ച മറ്റ് പ്രധാന വ്യക്തികൾ. ഈ ഉന്നത ഉദ്യോഗസ്ഥരെക്കൂടാതെ സിഎംആർഎല്ലിലെ മറ്റ് ചില ജീവനക്കാർക്കും അന്വേഷണ സംഘത്തിന് മുന്നിൽ ഹാജരാകാൻ നിർദേശം നൽകിയിട്ടുണ്ട്.

കൊച്ചിയിലെ സിഎംആർഎൽ (കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ്) എന്ന സ്വകാര്യ കമ്പനിയും ടി. വീണയുടെ ഉടമസ്ഥതയിലുള്ള എക്‌സാലോജിക് സൊല്യൂഷൻസ് എന്ന ഐടി കമ്പനിയും തമ്മിൽ നടന്ന സാമ്പത്തിക ഇടപാടുകളുമായി ബന്ധപ്പെട്ടതാണ് ഈ കേസ്. 2017 മുതൽ 2020 വരെയുള്ള കാലയളവിൽ എക്‌സാലോജിക് കമ്പനിക്ക് സിഎംആർഎൽ 1.72 കോടി രൂപ നൽകിയെന്നും, എന്നാൽ ഇതിന് പകരമായി യാതൊരുവിധ ഐടി സേവനങ്ങളും കമ്പനി നൽകിയിട്ടില്ലെന്നുമാണ് ഉയർന്നുവന്ന ആരോപണം.

ഇൻകം ടാക്സ് ഇന്ററിം സെറ്റിൽമെന്റ് ബോർഡിന്റെ കണ്ടെത്തലുകളോടെയാണ് ഈ വിഷയം ആദ്യം പുറത്തുവരുന്നത്. ചെയ്യാത്ത സേവനത്തിന് പ്രതിഫലം കൈപ്പറ്റിയത് കള്ളപ്പണം വെളുപ്പിക്കൽ നിരോധന നിയമത്തിന്റെ പരിധിയിൽ വരുമെന്ന് ചൂണ്ടിക്കാട്ടിയാണ് ഇഡി കേസെടുത്ത് പ്രാഥമിക അന്വേഷണം ആരംഭിച്ചത്.

നേരത്തെ, ഒരു എഫ്‌ഐആര്‍ പോലും രജിസ്റ്റർ ചെയ്യാതെയുള്ള ഇഡി അന്വേഷണം സ്റ്റേ ചെയ്യണമെന്നാവശ്യപ്പെട്ട് സിഎംആർഎൽ കമ്പനി ഹൈക്കോടതിയെ സമീപിച്ചിരുന്നു. എന്നാൽ അന്വേഷണത്തിന് യാതൊരു തടസവുമില്ലെന്നും, കള്ളപ്പണം വെളുപ്പിക്കൽ സംബന്ധിച്ച വിഷയങ്ങളിൽ സ്വതന്ത്രമായി അന്വേഷിക്കാൻ ഇഡിക്ക് പൂർണ അധികാരമുണ്ടെന്നും വ്യക്തമാക്കി ഹൈക്കോടതി സിംഗിൾ ബെഞ്ചും ഡിവിഷൻ ബെഞ്ചും ഹരജികൾ തള്ളി.

കേന്ദ്ര കോർപ്പറേറ്റ് മന്ത്രാലയത്തിന് കീഴിലുള്ള സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്എഫ്ഐഒ) അന്വേഷണം നടത്തുന്നതിനാൽ ഇഡിയുടെ സമാന്തര അന്വേഷണം ആവശ്യമില്ലെന്ന കമ്പനിയുടെ വാദവും കോടതി അംഗീകരിച്ചില്ല. ഈ അനുകൂല വിധിയുടെ പശ്ചാത്തലത്തിൽ അന്വേഷണം ഊർജ്ജിതമാക്കിയ അന്വേഷണസംഘം നടപടികൾ വേഗത്തിലാക്കുകയും ഔദ്യോഗികമായി സമൻസ് കൈമാറുകയുമായിരുന്നു.

സാമ്പത്തിക ഇടപാടുകളുടെ രേഖകൾ, ബാങ്ക് അക്കൗണ്ട് വിവരങ്ങൾ, ഡിജിറ്റൽ ഉപകരണങ്ങൾ എന്നിവ അടിസ്ഥാനമാക്കിയുള്ള വിശദമായ ചോദ്യം ചെയ്യലായിരിക്കും നടക്കുക. ഇതിനുപുറമെ, എസ്എഫ്ഐഒ ഇതുവരെ ശേഖരിച്ച കേസ് രേഖകൾ കൂടി വിട്ടുകിട്ടുന്നതിനായി ഇഡി കോടതിയെ സമീപിച്ചിട്ടുണ്ട്. ഈ രേഖകൾ കൂടി പരിശോധിച്ച് ചോദ്യം ചെയ്യുന്നതോടെ വരുംദിവസങ്ങളിൽ കേസിൽ കൂടുതൽ നിർണായക നടപടികൾ ഉണ്ടായേക്കാം.