ഹിന്ദുരാഷ്ട്രം എന്ന ആശയത്തെ ക്രിസ്ത്യാനികളും മുസ്ലീങ്ങളും ഭയപ്പെടേണ്ടതില്ല : ബാബാ രാംദേവ്

ന്യൂഡല്‍ഹി : ഹിന്ദുരാഷ്ട്രം എന്ന ആശയത്തെക്കുറിച്ച് ആരും ഭയപ്പെടേണ്ടതില്ലെന്നും ഇന്ത്യയില്‍ ക്രിസ്ത്യാനികളും മുസ്ലീങ്ങളും യാതൊരുവിധ ഭീഷണിയും നേരിടുന്നില്ലെന്നും യോഗ ഗുരു ബാബാ രാംദേവ്. ‘നമ്മുടെ പൂര്‍വ്വികര്‍ ഒന്നാണ്’ എന്നും ബാബാ രാംദേവ് പറഞ്ഞു.

‘ഹരിദ്വാറിന് സമീപം ദേവ്ബന്ദ് എന്നൊരു സ്ഥലമുണ്ട്. 2009-ല്‍ എന്നെ അങ്ങോട്ട് ക്ഷണിച്ചിരുന്നു. അന്ന് ഞാന്‍ അവരോട് പറഞ്ഞു, നമ്മുടെ മതങ്ങള്‍ വ്യത്യസ്തമായിരിക്കാം, എന്നാല്‍ നമ്മുടെ പൂര്‍വ്വികര്‍ ഒന്നാണ്. ഹിന്ദുരാഷ്ട്രം എന്ന ആശയത്തെ ആരും ഭയപ്പെടേണ്ടതില്ല. നമ്മുടെയെല്ലാം പൂര്‍വ്വികര്‍ സനാത ഹിന്ദു ആര്യ-വൈദികരായിരുന്നു. ഇത് നമ്മുടെ മുന്നില്‍ തന്നെ എഴുതിവെച്ചിട്ടുണ്ട്’,’ ഉത്തര്‍പ്രദേശിലെ ഇസ്ലാമിക സെമിനാരി സന്ദര്‍ശിച്ച സംഭവം അനുസ്മരിച്ചുകൊണ്ട് രാംദേവ് പറഞ്ഞു.

‘ചില ആളുകള്‍ ചോദിക്കാറുണ്ട്, ഒരു ഹിന്ദുരാഷ്ട്രം സ്ഥാപിതമായാല്‍ മുസ്ലീങ്ങള്‍ എങ്ങോട്ട് പോകും? നിങ്ങളുടെ പൂര്‍വ്വികരുടെ പാരമ്പര്യങ്ങള്‍ ലളിതമായി ഉള്‍ക്കൊള്ളുക. നിങ്ങള്‍ക്ക് താടി വളര്‍ത്താം അല്ലെങ്കില്‍ അത് വടിക്കാം. ഇഷ്ടമുള്ള വസ്ത്രം ധരിക്കാം, എന്നാല്‍ നിങ്ങളുടെ പൂര്‍വ്വികരെപ്പോലെയുള്ള ഒരു സ്വഭാവം നിലനിര്‍ത്തുക. ഇവിടെ മുസ്ലീങ്ങള്‍ക്കോ ക്രിസ്ത്യാനികള്‍ക്കോ യാതൊരു അപകടവുമില്ല,’ ബാബാ രാംദേവ് പറഞ്ഞു. വിവിധ രാഷ്ട്രീയ പാര്‍ട്ടി നേതാക്കള്‍ ബാബാ രാംദേവിന്റെ പ്രസ്താവനയോട് വിയോജിപ്പ് രേഖപ്പെടുത്തി.